節日特備節目。
祝天下有情人，保持愛情的溫度。
《情人節放閃》
「其實係邊個發明情人節㗎？」男孩從餐廳走出來，嘆了一口氣。
「做咩喎……下年我請返你食飯囉，哼！」女孩向男孩做個鬼臉。
「哈哈，嗱，你話㗎！」
「下年先算啦，話唔定我識咗個靚仔呢，呵呵呵。」
「喂，唔好呀，對唔住呀BB，我每年都會請你食飯，你唔好搵第二個啊！」
「睇你乖唔乖啦。」女孩拍拍男孩的頭。「Hand hand！」
「有人睇住呀，唔好玩啦。」男孩左右觀望街上的行人。
「咁我自己返屋企嚕。」女孩轉身。
「好好好你贏！」男孩洩氣地伸出手。
女孩甜甜一笑，拖著男孩的手，踏著小跳步前行。
「唔好行咁快啦，好飽呀。」男孩沒好氣地說。
「鬼叫你食咁飽。」
「家陣好似係你話要減肥，俾咗你大半份我喎。」
「你應該話我唔肥，然後俾我食返嘛。」
男孩不答，望著女孩怪笑。
「你好嘢！你真係覺得我肥。」女孩用力地掐男孩的手。
「冇呀，我都冇出聲。」
「你去死啦。」
「有個咁靚嘅女朋友，我唔捨得死呀。」
女孩嗤的一聲，忍不住笑起來。
「靚女你好！」男孩誇張地說。
「突然間咁好口。」
「梗係啦，我咁錫你。」
「有幾錫先？」
男孩停步，用力抱著女孩。
「好錫，非常錫。」
「有人睇住呀，唔好玩啦。」女孩害羞地說。
「我真係好錫你㗎。」
「情人節你先咁講嘅！」
「唔係，我唔止係情人節，我每日都會好錫你，錫晒你！」男孩輕輕吻向女孩的臉。「我錫……」
女孩慘叫一聲，全身發出猛烈的閃光，突然燃燒起來。男孩大驚之下推開女孩，看著她逐漸變成焦黑的一塊。男孩雙眼充滿淚水，崩潰地跪在地上。
「我錫到你燶，我錫到你燶呀！」男孩大哭。
文：謝天下
Search